Malem ReboWage

dening: Irul S. Budianto

ora susah pengin ngrangkul rembulan

bengi iki dheweke nembe diincer kalarahu

peteng sing wis kebacut jejigaran

ora-orane bakal ngendheng laku, njereng saru-siku

becik wektu iki kanggo tetirah

ngudhari jiwa kang sayah

mbundheli aluamah

ing plataran prawan sunthi pinjungan

ngadhep kiblat nilingake wiramane ambegan

saka akasa banjur keprungu swara:

“Ora salah kowe tugur anoraga

ngipatake sakehe sukerta lan memala”.

Donohudan, 2015